For Filipino!

*** Cha-cha susi sa pag-unlad ng Pinas Ulat ni: Malou Rongalerios ***

Tiniyak kahapon ng mga kongresista na magiging susi sa pag-unlad ng bansa ang mungkahing baguhin ang sistema ng pamahalaan sakaling tanggapin ito ng taumbayan sa pamamagitan ng isang plebisito.

Sa pinagsamang kalatas, sinabi rin nina House Deputy Speaker for Mindanao Gerry Salapuddin at Manila Rep. Ernesto "Banzai" Nieva na kapakanan ng sambayanan ang layunin sa pagpupursige ng mga mambabatas na maipatupad ang pagbabago sa pamahalaan upang makahikayat ng mas maraming pamumuhunan at pantay-pantay na maibigay sa mamamayan ang kaunlaran at kasaganahan.

Ginawa nina Salapuddin at Nieva ang pahayag makaraan ang pagdududang ginawa ng Moody's Investors Service na babagal ang kaunlaran ng bansa sa pagsusulong ng Charter change.

Ayon pa kay Salapuddin, walang basehan ang pahayag ng Moody's dahil kabaligtaran ito sa magaganap sakaling aprubahan ng taumbayan ang pag-amyenda sa Saligang batas.

Aniya, mas lalo pang uunlad ang ekonomiya ng Pilipinas sa sandaling payagan ang mga dayuhan na magmay-ari ng negosyo at kalupaan sa bansa.

Sinabi naman ni Nieva na ang pagbuo ng pamahalaan ng isang Constitutional Commission upang pag-aralan kung anong mga probisyon sa Konstitusyon ang dapat baguhin ay isang palatandaan na determinado ang administrasyon na ipatupad ang pagbabago.

Aniya, ang pagreporma sa Saligang Batas ay matatag na sinusuportahan ng mga kongresista dahil nais na nilang mapalitan ang pampulitikang sistemang nakabatay sa maruming pamumulitika.

Hinikayat din ni Nieva ang Moody's at iba pang international credit rating na tigilan muna ang paghuhusga sa pagsusulong ng Cha-cha at sa halip ay magbigay ng mungkahi kung papaano pa mapapalakas ang pagpapatupad dito.

Courtesy of Ang Pilipino Star Ngayon

*** P125 umento pinamamadali ***

Pinamamadali na sa Kongreso ang panukalang P125 wage hike dulot na rin ng epekto ng expanded value added tax (EVAT).

Iginiit ng Kilusang Mayo Uno (KMU) sa mga mambabatas na ito ang tamang panahon para magtrabaho at gumawa ng paraan upang maitaas ang sahod ng mga manggagawa sa bansa upang hindi nila maramdaman ang epekto ng EVAT.

Hiniling ni KMU Secretary General Joel Maglunsad na aprubahan sa lalong madaling panahon ang P125 across-the-board wage increase na may ilang buwan na ring inaamag sa Mababang Kapulungan.

Binigyang-diin ng mga manggagawa na mataas pa ang halaga ng kanilang gastusin kaysa sa kinikita sa paghahanapbuhay. Halos may P600 anila ang gastos ng isang pamilya sa isang araw na higit na mas malaki kumpara sa arawang kita nila na P275.

Nakatakdang lumusob ang grupo sa Kongreso sa darating na Lunes upang kalampagin ang mga kongresista na aksiyunan ang matagal na nilang karaingan.

Ayon naman kay Bayan Muna Rep. Teddy Casino, matatalakay lamang ang naturang panukala kung sesertipikahang "urgent" ni Pangulong Arroyo ang wage bill.

Courtesy of Ang Pilipino Star Ngayon

*** CBCP PUMALAG NA VS GMA ***

Pumalag na rin kay Pangulong Arroyo ang pamunuan ng Catholic Bishops Conference of the Philippines (CBCP) matapos na bombahin ng tubig ang isinagawang protest march ng tatlong obispo ng Simbahan at ni dating Bise Presidente Teofisto Guingona nitong nakaraang Biyernes sa Recto Ave.

Sa isang pahayag ni Archbishop Angel Lagdameo, incoming president ng CBCP, sinabi nito na hindi dapat ginamitan ng tubig ang mga sumama sa prusisyon dahil isa itong krusada para sa "good governance".

"It was a patriotic manifestation of concern for our country because it was a prayer assembly and peaceful procession (and) violent dispersal of the participants was uncalled for and objectionable," ani Lagdameo.

Magugunitang pinatikim ng calibrated preemptive response (CPR) ng pulisya ang nagmartsang mga obispo at madre pagsapit sa San Sebastian College sa CM Recto Ave.

Nagpumilit umanong lumusot sa Mendiola ang grupo kaya napilitan silang gamitan ng water cannon at nadamay pati sina Guingona, Sen. Jamby Madrigal, dating Executive Sec. Oscar Orbos, Rep. Satur Ocampo at Fr. Robert Reyes.

Batay sa napagkasunduan ng pulisya at ng mga organisador ng pagkilos, maaari lamang mag-martsa hanggang sa simbahan ng San Sebastian sa C.M. Recto ang mga kasama sa prusisyon.

Inalis naman bilang deputy ground commander ng anti-riot activities si Supt. Florencio Ortilla na siya umanong nag-utos ng pagbomba ng tubig.

Samantala, iniutos na ni Pangulong Arroyo ang masusing imbestigasyon kung may paglabag ang PNP sa isinagawang dispersal at pagtira ng water cannon sa mga ralista.

Courtesy of Ang Pilipino Star Ngayon

*** P9.00 pasahe hirit ***

Muli na namang humiling ang transport group ng panibagong taas pasahe sa mga pampasaherong jeep nationwide.

Sa kanilang kahilingan, mula sa kasalukuyang P7.50 minimum fare sa mga pampasaherong jeep ay nais nila itong dagdagan ng P1.50 para maging P9.00 na ang pasahe sa PUJ.

Sa isang panayam, sinabi ni Zeny Maranan, Pangulo ng Federation of Jeepney Operators and Drivers Association (FEJODAP) pangungunahan nila ang hanay ng transportasyon sa pagsasampa ng P9.00 fare increase petition sa Land Transportation Franchising Regulatory Board (LTFRB) sa susunod na linggo dahil umabot na sa P32.00 kada litro ang presyo ng diesel mula sa dating P26.00 per liter.

Binigyang diin pa ni Maranan na hindi naman lahat ng gasolinahan ay nagbibigay sa kanila ng P1.00 discount sa bawat pagpapakarga ng diesel kaya't minarapat na nilang magsampa ng petisyon.

Inisnab din ng FEJODAP ang pahayag kamakailan ni LTFRB Chairperson Ma. Elena Bautista na hindi na siya magpapalabas ng desisyon para sa isa pang fare increase. Noong May 26,2005 huling naganap ang pagtaas sa pasahe ng mga jeep.

Sinabi pa ni Maranan na kabilang din sa grupong magsasampa ng fare increase petition ay ang Allianced of Transport Operators and Drivers Association of the Philippines (ALTODAP).

Nauna rito, nagbanta rin ang samahan ng mga pampasaherong bus na magsasampa rin sila ng fare increase petition sa LTFRB dahil sa katulad na argumento ng mga jeep nationwide.

Courtesy of Ang Pilipino Star Ngayon

*** CBCP, 'yes' sa people power ***
(Mer Layson/Gemma Amargo/Lilia Tolentino)

Pinanindigan kahapon ng Catholic Bishops Conference of the Philippines (CBCP) ang kanilang naunang desisyon na hindi mananawagan sa pagpapababa sa puwesto kay Pangulong Arroyo subalit bukas umano sila sa people power.

Ito ang napagkasunduan ng mga obispo na dumalo sa isinagawang regular na meeting ng Permanent Council ng CBCP na binubuo ng 12 mga obispo at arsobispo kahapon.

Bagamat hindi tutol ang CBCP sa people power, sinabi nila na hindi ito dapat isagawa nang may kaakibat na karahasan at dapat ay naaayon sa tamang moral principle at sa prinsipyo ng Rule of Law.

Nilinaw rin ni outgoing president at Davao Archbishop Fernando Capalla na para sa taumbayan ang pananaw na ito ng simbahan sa people power at hindi para sa mga obispo at pari.

Muling hiningi ng CBCP sa mamamayan na pag-ibayuhin pa ang panalangin at tigilan na ang pamumulitika sa bansa na nagbubunsod upang lalong maghirap ang bansa at magkahati-hati ang mga Filipino.

Nang tanungin si Capalla kung sa palagay nila ay natupad ba ni Pangulong Arroyo ang mga pangako nito, "iilan lamang" sa mga pangako ng Pangulo ang nakita nilang natupad.

Courtesy of Pilipino Star Ngayon

*** Construction ng Northrail sisimulan na ***

Inihayag kahapon ni Northrail president Jose Cortes Jr. na magsisimula na ang construction ng $420 milyong North Luzon Railways project na mag-uugay sa Metro Manila at Central Luzon simula sa Oktubre.

Ayon kay Cortes, ang mass transport system na ito ay makakatulong upang mapayabong ang takbo ng turismo at ekonomiya sa Central at Northern Luzon.

"There are 35 Chinese engineers in the country with their own equipment doing groundtesting and making sure that ony those properties owned by the Philippine National Railways (PNR) will be used for the project," wika ni Cortes.

Aniya, ang construction ay magiging 'full blast' simula sa Oktubre kung saan ay inaasahang nasa ayos na lahat ang relokasyon ng mga residenteng tatamaan ng proyekto.

Siniguro kay Cortes ni Vice Pres. Noli de Castro na ang relokasyon ng mga residenteng tatamaan mula sa Caloocan City hanggang Valenzuela City ay makukumpleto na sa katapusan ng Setyembre. Anim na bilyong piso ang inilaan ng pamahalaan para sa relokasyon ng may 70,000 illegal tenants sa riles ng PNR.

Ang Phase 1 ng Northrail project ay tatakbo sa double-track railway na mayroong 6 stations mula Sangandaan, Caloocan City; Valenzuela City, Marilao, Bocaue, Guiguinto hanggang Malolos, Bulacan. Ang depot ng Northrail ay nasa Valenzuela City.

Courtesy of Ang Pilipino Star Ngayon

*** Gloria suko na! Ni Lilia Tolentino ***

Inamin kahapon ni Pangulong Arroyo na malamang magtagal pa ang political crisis sa bansa dahil sa pinagtatalunang mga isyu sa impeachment at Charter Change, pero ipauubaya niya sa Kongreso at sa itatatag na Preparatory Consultative Committee ng Cha-cha kung paiikliin ang nalalabi pa niyang 5-taong panunungkulan sa puwesto.

Sinabi ng Pangulo sa kauna-unahan niyang press conference sa mga miyembro ng Malacanang Press Corps matapos magkaroon ng krisis pulitikal dahil sa isyu ng "Hello Garci" tapes na ang Kongreso ang siyang may exclusive prerogative sa pag-amyenda kaya ito ang puwedeng magdesisyon kung dapat pa ba niyang tapusin ang 6-taon niyang panunungkulan.

Ang termino ng panunungkulan ng Pangulo ay inirekomenda ni dating Pangulong Fidel Ramos kaugnay ng isinusulong niyang cha-cha na siya umanong makakalutas sa kasalukuyang krisis. Nauna rito ay nanindigan ang Malacanang na tatapusin ng Pangulo ang kanyang termino hanggang 2010.

Inihayag din ng Pangulo na pinag-aaralan pa ang planong pagtatatag ng Preparatory Consultative Committee para sa Cha-Cha at binabalangkas pa ang isang administrative order ukol dito. Nais ng Pangulo na italaga si dating UP president Jose Abueva bilang pinuno ng committee. Magsasagawa ang Pangulo ng malawakang pakikipag-konsultasyon sa mamamayan para alamin ang damdamin ng bayan hinggil sa Cha-Cha.

Courtesy of Ang Pilipino Star Ngayon

*** Resignation, karahasan vs GMA tinutulan ng CBCP Ni Danilo Garcia ***

Hindi nakiisa ang Catholic Bishop Conference of the Philippines (CBCP) sa panawagang magbitiw si Pangulong Gloria Macapagal-Arroyo at tinutulan ang anumang karahasan para sa puwersahang pag-agaw ng kapangyarihan.

Ito ang pinal na posisyon ng CBCP sa pamumuno ni CBCP President, Davao Archbishop Fernando Capalla na inilahad sa isinagawang pulong balitaan na dinaluhan ng may 70 Obispo sa Pope Pius Manila kahapon ng hapon matapos ang halos isang linggong debatehan at palitan ng pananaw.

Sinabi ni Capalla na wala silang makitang alternatibong solusyon na iniaalok ng iba't ibang sektor sa bansa kung sakaling magbibitiw ang Pangulo. Matibay ang paninindigan ng Simbahang Katoliko na hindi nila sinusuportahan ang isang madugong paraan para magpalit ng pamahalaan at pamamayani ng isang "military junta".

"There is no single political option that can claim to be the demand of the Gospel. We think, she should not ignore the call for her resignation," ayon kay Capalla.

Nais ng mga Obispo na dumaan sa tamang proseso sa pamamagitan ng pagsunod sa Saligang Batas ang anumang usapin ukol sa jueteng, korupsyon at "GMA-Garci tape" na ibinabato sa Pangulo.

Ibinasura pa ang hakbanging suportahan ang mga pulitiko na naglalayong mapatalsik sa puwesto ang Pangulo.

Sa kabila nito, sinabi ni Capalla na nararapat na pagsisihan ng Pangulo ang kanyang aksyon na naging sanhi ng pagkawala ng tiwala ng publiko sa pamahalaan at sa mga institusyon nito.

"The President must discern very deeply to what extent she has contributed to the erosion of public trust," ayon sa pastoral statement ng CBCP.

Sa kabila nito, pabor ang Simbahang Katoliko sa pagtatatag ng isang "truth commission" at ang pagsasagawa ng isang "impeachment process" laban sa Pangulo. Nararapat umano na magkaroon ng "credible Congress" na siyang hahawak ng impeachment upang hindi magduda ang publiko.

Pinapurihan naman ng mga Obispo ang sektor ng military at pulisya sa pananatiling "neutral" sa usapin sa pulitika. Naniniwala ang Simbahan na ang anumang marahas na solusyon ay lalo lamang magreresulta ng mga bagong paglabag sa batas.

Iginagalang naman ng CBCP ang pagpapahayag ng samu't saring opinyon ng iba't ibang sector at publiko ngunit nanawagan na magnilay-nilay at magdasal para sa ikabubuti ng bansa.

Courtesy of Ang Pilipino Star Ngayon Newspaper

*** Paggamit ng 'red plate' pinababantayan ***

Sa gitna nang pagtaas ng presyo ng krudo sa pandaigdigang pamilihan, sama-samang nanawagan ang tatlong kongresista na buhayin ang kampanya laban sa mga abusadong opisyal at empleyado ng gobyerno na gumagamit ng mga sasakyan ng pamahalaan kahit na hindi sa opisyal na lakad.

Ayon kina Reps. Joel Mayo Almario (Davao Oriental), Vincent Garcia (Davao City) at Joel Villanueva (CIBAC party-list), "ningas-cogon" lamang ang naunang kampanya ng pamahalaan laban sa paggamit ng "red plate" na sasakyan bilang bahagi ng pagtitipid ng pondo dahil marami pa ring nakikitang nakaparada sa mga parking lots ng mga mall.

Maituturing rin anyang katiwalian ang pang-aabuso sa paggamit ng mga government vehicles dahil pera ng taumbayan ang ginagastos sa maintenance at gasolina nito.

Ayon sa mga solon, kailangan ang sama-samang pagsasakripisyo dahil wala pang kakayahan ang bansa na magkaroon ng sapat na suplay ng krudo.

Kabilang sa iminungkahing pagtitipid ni Almario sa panig ng pamahalaan ay ang pagsubasta sa lahat ng sasakyang de-otso ang makina at ang pagbiyahe sa ibang bansa ng mga opisyal at kawani bilang mga ordinaryong pasahero sa eroplano.

Hiniling naman ni Villanueva sa Department of Energy na tapusin na ang muling pag-aaral sa batas hinggil sa Downstream Oil Industry Deregulation Law at ibigay na sa Kongreso ang mga mungkahing pagbabago sa nasabing batas.

Iminungkahi rin ni Garcia na dapat kontrolin ng pamahalaan ang paggamit sa mga sasakyan nito at ang pagbibigay ng tinaguriang gas slips.

Courtesy of Ang Pilipino Star Ngayon Newspaper

*** Dagdag-benepisyo sa working students isinulong ni Sen. Villar ***

Nakakita ng kakampi sa Senado sa katauhan ni Sen. Manny Villar ang libo-libong working students sa bansa na nagpupunyaging makapagtapos ng pag-aaral sa pamamagitan ng sipag at tiyaga.

Ayon kay Sen. Villar, panahon nang dagdagan ang tinatanggap na mga benepisyo ng mga working students kaya inihain nito ang Senate Bill 570 na layong mapalawak ang sakop ng pagbibigay trabaho sa mga estudyante. Aamyendahan ng panukala ang RA 7323 o Special Program for Employment of Students Law.

Ayon kay Villar, ang suweldo ng mga working students ay hindi dapat bumaba sa minimum wage o suweldo na tinatanggap ng mga kawani sa pribadong sektor.

Saludo din ang senador sa pagsisikap ng mga working students na mapaganda ang kanilang buhay sa sariling sikap at tiyaga. "Alam na alam ko ang hirap at dusa ng isang working student dahil pinagdaanan ko iyan noong nag-aaral pa ako sa UP. Mahirap pagsabayin ang pag-aaral at pagtatrabaho kaya saludo ako sa kanila dahil sa mataas na pagpapahalaga nila sa edukasyon," ani Villar.

Courtesy of Pilipino Star Ngayon

*** Remittance ng Pinoy seamen tataas pa ***

Inaasahan ng Department of Labor and Employment (DOLE) na lalo pang tataas ang remittance ng mga Filipino-based workers sa taong ito matapos magdesisyon ang JO Tankers AS sa Bergen, Norway na kunin ang serbisyo ng karagdagang mga Pinoy seafarers. Ang JO Tankers ang pangatlo sa pinakamalaking chemical tanker fleet sa buong mundo.

Dahil dito, tinatayang mahihigitan pa ang $1.461 billion remittance ng mga marinong Pinoy sa nagdaang taon. Sa muling pagbisita sa Pilipinas ni Kjell Ove Breivik, director for ship management ng JO Tankers, ipinagmalaki nito ang pag-angat ng kanilang kumpanya nitong 2004 at first quarter ng 2005.

Upang mas mapanatili ang competitive edge ng JO Tankers, ipinahayag ni Breivik ang pagbibigay prayoridad sa pag-eempleyo ng Pinoy senior officers. Papalitan ng mga Pinoy ang ilan nilang European counterparts at mga tripulanteng Indonesians. Target ng JO Tankers na makakuha ng 780 Pinoy officers sa pagtatapos ng taong 2006. Sa ngayon, 22 sa kabuuang 30 barko ng JO Tankers ang pinatatakbo na ng may 588 opisyal at tripulanteng Pinoy.

Courtesy of Pilipino Star Ngayon

*** P125 WAGE HIKE MALABO ***

Malabong maihabol pa sa May 1 ang panukalang P125 legislated wage increase na siya sanang hinihintay ng mga manggagawa.Ito'y matapos na muling mabigo kamakalawa ang Kamara na isalang sa plenaryo ang panukala dahil na rin sa kawalan ng quorums. Ayon kay House committee on labor Rep. Roseller Barinaga, malabo ng maihabol sa May 1 ang pagpapatibay ng panukala dahil gahol na rin sa oras. Gayunpaman, umaasa si Barinaga na maaksyunan pa rin ng Kamara ang panukala sa susunod na taon.

Sa kabilang dako, naghain kahapon ng petisyon para sa dagdag na P78 across-the-board wage ang Trade Union Congress of the Philippines (TUCP) sa National Capital Region Tripartite Wage and Productivity Board bilang panapat sa tumataas na cost of living ng mga manggagawa.

Ipinaliwanag ng TUCP na ang nasabing halaga ay tama lamang na ibigay sa mga manggagawang Pilipino sa bansa upang makasunod naman ang mga ito at ang kanilang pamilya sa patuloy na tumataas na cost of living at nang mabawi naman ng mga ito ang kanilang sumasadsad namang purchasing power. Samantala, nagbanta naman ang Kilusang Mayo Uno na hindi umano nito tatanggapin kung barya lamang ang ipagkakaloob na umento ng pamahalaan sa mga manggagawa bilang regalo sa selebrasyon ng Labor Day sa Mayo 1. Sinabi ng KMU, ang matatanggap lamang nila ay ang national legislated wage increase na P125 dagdag sa arawang sahod at hindi ang baryang dagdag sa Emergency Cost of Living Allowance (ECOLA) at baryang umentong ibibigay ng NCRTWPB.

Courtesy of Abante Tonite Newspaper.

*** Pension ng retiradong SSS members itinigil Ulat ni Angie dela Cruz ***

Pansamantalang sinuspinde ng Social Security System (SSS) ang pagkakaloob ng pension sa mga retiradong miyembro nito nationwide na ang account ay nasa bangko at hindi nakukuha ng mahigit isang taon.

Ang hakbang ayon sa SSS ay upang ma-obliga ang mga SSS pensioners na makipag-ugnayan muna sa ahensiya upang maisaayos ang status ng mga miyembro nito.

Ayon kay SSS spokesman Joel Palacios, kung namatay na ang pensioner ay ang mga kaanak na lamang nito ang makikinabang sa pension nito.

Alinsunod umano sa SSS rules, kapag namatay na ang isang pensioner o muling mag-asawa, o nasa labas na ng bansa, ang pension ng mga ito ay agad na puputulin ng ahensiya.

Umaabot sa 21,000 pensioners umano ang hindi na nakukuha sa bansa ang kanilang pension.

Upang maiwasan anya ang gusot sa pagkakaloob ng pension sa mga pensioners, gagawin nila tuwing sa ika-2 at ika-4 na Huwebes ng bawat buwan ng Abril at Mayo ang pag-iisyu ng pensioners nationwide.

May 1 milyon na ang pensioners nationwide noong 1991 at tumataas ito ng 10 porsiyento kada taon.

Courtesy of Pilipino Star Ngayon

*** 'Bagong trabaho, mataas na suweldo' isusulong (Lilia Tolentino) ***

May ikakasa ang gobyerno na "new high wage jobs" na magiging sagot sa paghihirap ng sambayanang Filipino sa patuloy na pagtaas ng presyo ng gasolina sa bansa.

Ayon kay Pangulong Arroyo, bunsod ng wala sa kontrol ng gobyerno na awatin ang mga oil firms sa patuloy na pagdaragdag ng mga ito sa presyo ng langis ay susubukan niya ang bago niyang estratehiya na bigyan ng trabahong may malaking sahod ang taumbyan, hikayatin ang mga foreign investors at panatilihing matatag ang ekonomiya ng bansa para hindi maramdaman ang matinding hirap sa "bulsa" ng tanikalang dagdag sa presyo ng langis.

Naniniwala ang Pangulo na kapag kumpiyansa ang isang gobyerno na bigyan ng magandang hanapbuhay ang isang tao na may mataas na sahod ay magiging matatag ang ekonomiya ng bansa.

Subalit ngayon ay kailangan munang tapyasan ang lahat ang paggastos sa mga walang kabuluhang bagay dahil ang paglobo ng budget deficit ay nangangahulugan ng pagtaas ng presyo ng mga pangunahing bilihin at serbisyo.

Iyon nga lamang ay makakatiyak ang mga consumers na mapo-protektahan ang kanilang karapatan sa tulong na rin ni Vice-President Noli de Castro na tatayo naman bilang "Price czar".

Habang hinihintay naman ang magiging resulta ng bagong estratehiyang ito ng Pangulo ay patuloy naman ang ginagawang pagrerebisa ng pamahalaan sa panukalang ibasura ang Oil Deregulation Law.

Sa katunayan, mayroong nilikhang Oil Deregulation Law Committee ang Department of Energy (DoE) na siyang titimbang kung karapat-dapat na ngang ibasura ang nasabing kontrobersiyal na batas.

Courtesy of Pilipino Star Ngayon

*** PROBLEMA SA VOIP TATALUPAN NG SENADO (BOYET JADULCO) ***

NAKATAKDANG IMBESTIGAHAN NG SENADO ANG MGA PROBLEMANG KINAKAHARAP NG 'VOICE OVER INTERNET PROTOCOL' (VOIP) UPANG MALAMAN KUNG BAKIT HINDI MAKAANGAT AT TULUYANG MAGAMIT NG MILYUN-MILYONG FILIPINO ANG MAKABAGONG TEKNOLOHIYA SA KOMUNIKASYON.

"IN VIEW OF VOIP'S TREMENDOUS PROMISE TO PROVIDE MORE COST-EFFECTIVE VOICE CALLS, PARTICULARLY FOR OUR SMALL AND MEDIUM ENTERPRISES AND OVERSEAS WORKERS, IT HAS BECOME IMPERATIVE FOR US TO REVIEW AND RESOLVE ALL POLICIES HINDERING COMMERCIAL PUBLIC ACCESS TO THE NEW TECHNOLOGY," SABI NI SENADOR MAR ROXAS

IPINALIWANAG NG CHAIRMAN NG BICAMERAL CONGRESSIONAL OVERSIGHT COMMITTEE ON THE E-COMMERCE LAW NA ANG VOIP AY ISANG URI NG LONG-DISTANCE CALLS SA PAMAMAGITAN NG COMPUTER NA KONEKTADO SA INTERNET KUNG KAYA'T HINDI NA KINAKAILANGAN PANG MAGBAYAD NG LONG DISTANCE CHARGES SA TELEPHONE COMPANIES.

SA KASALUKUYAN, ANG LONG DISTANCE CALLS AY DUMADAAN PA SA CONVENTIONAL CIRCUIT SWITCHES NG TELEPHONE COMPANIES SA BANSA

Courtesy of Abante Newspaper

*** Divorce bill haharangin sa Kamara: Malou Rongalerios ***

Desidido si BUHAY party-list Rep. Rene Velarde na harangin sa Mababang Kapulungan ng Kongreso ang isusulong na panukala ng Gabriela at Bayan Muna na divorce bill. Ayon sa solon, magiging dahilan sa pagbagsak ng 'kasal' bilang institusyon ang diborsiyo kung ito ay maisasabatas sa Pilipinas. Dapat aniyang isaalang-alang ng mga magsusulong ng diborsiyo ang kasagraduhan ng kasal at isiping ito ang pundasyon ng isang pamilya.

"Ang marriage ang highest vocation na puwedeng pasukin ng isang tao kaya hindi ito dapat basta na lang i-dissolve dahil lang hindi magkasundo ang mag-asawa," ani Velarde.

Iginiit niya na dapat higpitan ang requirements sa mga nais magpakasal upang makatiyak na handa sila sa nais pasuking buhay. Mayroon naman anyang annulment sa bansa kaya walang dahilan para magkaroon pa ng diborsiyo.

Magugunitang sinabi nina Gabriela Rep. Liza Maza at Bayan Muna Rep. Satur Ocampo na isusulong nila ang divorce bill sa Kamara.

Courtesy of Pilipino Star Ngayon Newspaper

*** Apela ni GMA para sa OPAs ibinasura ng Japan, ni Ellen Fernando ***

Sa kabila ng pagpupumilit at pag-apela ng libu-libong Overseas Performing Artists (OPAs), tila wala na ring pag-asa ang mga ito matapos na ibasura ng pamahalaang Japan ang huling apela ni Pangulong Gloria Macapagal-Arroyo na 5-taong moratorium hinggil sa bagong immigration policy ng Japan.

Base sa ulat na nakalap ng Department of Labor and Employment (DOLE) sa Japan Foreign Ministry, maging ang panawagan ng Pangulo sa Japan Prime Minister na mapagbigyan ang hinaing ng mga Pinoy artists ay tuluyan nang ibinasura. Ito ay nangangahulugan na tuloy na tuloy na ang pagpapatupad ng bagong immigration laws ng Japan na naghihigpit sa mga Pinay entertainers na pumasok at magtrabaho doon.

Nabatid na maging ang 2-taong transition period na huling hirit ng OPAs ay ibinasura rin ng Japan government. Sinasabi ng OPAs na sa dalawang taong ibibigay na palugit ng Japan ay maaari na silang makapaghanda para sa re-training at pag-aaral upang maibigay ang hinihinging requirement ng mga pumapasok na OPAs sa Japan.

Courtesy of Pilipino Star Ngayon

*** 'United Opposition; ni Erap di pipigilan ni GMA ***

Hindi pipigilan ni Pangulong Gloria Macapagal-Arroyo si dating Pangulong Erap Estrada sa pagbuo ng tinatawag nitong "united opposition" ngayong nakabalik na ito sa bansa.

Ayon kay Press Sec. at Presidential Spokesman Ignacio Bunye, ang pagbuo ng nagkakaisang oposisyon ay depende sa mga miyembro ng oposisyon.

"Wala tayong kontrol sa oposisyon. Sila-sila ang nag-uusap diyan. Ang masasabi lang natin, kung mangyayari ay mas magaling. That will give the people a basis for comparison sa kasalukuyang administrasyon at iyong ipinanukala ng oposisyon," ani Bunye.

Samantala, nilinaw ng Palasyo na walang kinalaman ang Pangulo sa ginawang pagtatalaga ng 15,000 pulis para sa seguridad ng dating Pangulo.

Sinabi ni Bunye na PNP ang dapat na magpaliwanag sa aktuwal na preparasyon at bilang ng mga pulis para sa seguridad ni Erap. Kasabay nito, sinabi ni Bunye na pawang haka-haka lang ang sinasabing "third force" na nagbabalak na ipalikida si Erap sa pagbabalik nito.

Samantala, isang simpleng salu-salo ang inihanda ng oposisyon sa pagsalubong kay Erap sa rest house nito sa Tanay bilang tugon na rin sa panawagan ng pinatalsik na lider na papatagin ang oposisyon.

Ayon kay Sen. Jinggoy Estrada, natuwa ang kanyang ama sa ginawang sorpresa ng mga oposisyon matapos madatnan ang mga ito sa rest house sa Tanay kung saan ay naghanda ng mga pagkain

Courtesy of Pilipino Star Ngayon