For Filipino!

　December 12, 2003

*** Terminal fee sa domestic flight, nais gawing P200 ***

Simula Enero 1, P200 na ang ibabayad ng mga pasahero ng domestic flights na gumagamit sa Manila Domestic Airport at Ninoy Aquino International Airport (NAIA), mula sa dating P100. Pero, ang terminal fee para sa international flights ay mananatili sa P550 kada pasahero. Sa isang panayam, sinabi ni General Manager Edgardo Manda sa Kabayan na ang dahilan ng pagtataas ng bayad ay dahil obligado ang Manila International Airport Authority (MIAA) na bayaran ang P842-million foreign-assisted loan na ginamit sa pagtatayo ng NAIA Terminal 2. Ang pagbabayad ay magsisimula sa susunod na taon at babayaran ito sa loob ng 25 taon.

Hindi umano nagtaas ang MIAA ng terminal fee sa nagdaang tatlo hanggang limang taon. Naghahanap umano ng pondo ang MIAA para may maibayad sa utang. Gayunman, sinabi ni Manda na pinag-iisipan pa rin nila ang dagdag-singil at nakatakdang magsagawa ng public hearing ukol dito. Ayon sa Air Transportation Office, ang domestic passenger noong 2001 ay umabot sa 5,663,015, mas mababa sa naitala noong 2000 na 6,315,893. Nagbabala naman ang isang airline official na ang hakbang ay maaaging maging "counter productive." "It adds to the burden of the traveler," anang opisyal na tumangging magpakilala. Posible rin umanong makaapekto sa dami ng pasahero ang karagdagang bayad. Noong May ng kasalukuyang taon, nagbigay ng tax relief ang MIAA sa mga international airline dahil sa naging epekto sa ekonomiya ng severe acute respiratory syndrome (SARS).

Courtesy of Kabayan Newspaper

*** 91 senior citizens sa Makati, nagtapos ng livelihood training ***

Hindi hadlang ang edad sa pag-unlad ng sarili man o ng komunidad sa pangkabuuan. At tiyak na magkakatrabaho pa ang mga ito kung kanilang nanaisin. Pinatunayan ito ng mga senior citizen sa Makati na nagtapos ng computer literacy and Internet courses na iniaalok ng pamahalaang lokal ng lungsod. Sa ulat ni Editha Chan, presidente ng Makati Training, Placement and Livelihood Consortia (MTPLC), kay Mayor Jejomar C. Binay, isinaad nito ang pagtatapos ng 91 senior citizen, edad 60 hanggang 80 sa computer literacy at livelihood training courses mula Hulyo 2002 hanggang Hunyo 2003. Tinuruan ang mga matatanda ng basics ng MS Windows at MS Office applications tulad ng Word, Excel at Power Point. Natutunan din nila kung paano mag-surf sa Internet at gumamit ng e-mail. Ayon kay Chan karamihan ng senior citizens na nag-aral ay gustong matuto ng computer applications para sa kanilang mga negosyo.

Bukod sa computer literacy, ang mga senior citizen ay kumuha rin ng klase sa reflexology, dressmaking, cooking at cosmetology, wika ni Chan. Sa kasalukuyan, 34 senior citizens ang nakaenrol din sa mga nabanggit na kurso. Ginaganap ang klase sa 15 public elementary at high schools sa lungsod. Nakikinabang ang senior citizens sa Makati nang higit pa sa inaatas ng pambansang gobyerno. Kabilang dito ang libreng panonood ng sine, libreng wheel chair at maintenance medicine kapag kinakailangan at cakes sa kanilang mga kaarawan.

Bukod sa computer literacy, ang MTLPC ay nagsasagawa rin ng pagsasanay tungkol sa food preservation, fruit and vegetable carving, culinary arts, tailoring, cellphone repair, electrical building wiring, computer technician, basic automotive troubleshooting with car preventive maintenance, auto-electronics, at auto-driving with troubleshooting. Mula nang itatag noong 2000, ang MTLPC ay nakapagpatapos ito ng 5,000 out-of-school youth, kababaihan, walang trabahong adults, at mga mag-aaral na naghahanap ng pansamantalang trabaho.

Courtesy of Kabayan Newspaper

*** Trabaho alok ng Kazakhstan ***

May magandang pagkakataong mabigyan pa ng empleyo ang may 1,000 Pilipino sa Republic of Kazakhstan. Ito ang magandang balita ni Pangulong Arroyo sa sambayanan matapos ang ginawa niyang pakikipagpulong kay Prince Minister Nursultan Nazarbayev na kasalukuyang bumibisita sa bansa.

Sa magkasanib na press conference ng dalawang lider na ginanap sa Palasyo, inihayag ng Pangulo na may 5,000 nang Pilipino ang nagtatrabaho sa naturang bansa sa larangan pa rin ng industriya ng langis. Sinabi ng Pangulo na ang pagbisita ng Prime Minister ng Kazakhstan sa bansa ay nagresulta sa paglagda ng tatlong kasunduan para ibayo pang mapaglapit ang relasyong pagkakaibigan at pagtutulungan ng dalawang bansa.

Kabilang dito ang exemption sa pagkuha ng visa ng mamamayan ng dalawang bansa na nagtataglay ng diplomatic passport, pagtutulungan sa larangan ng turismo at pagkakataong makalapag sa Kazakhstan ang eroplano ng bansa na nagseserbisyo sa rutang malapit sa kanilang bansa.

Inihayag pa rin ng Pangulo na nangako sa kanya si Prime Minister Nazarbayev na bibigyang prayoridad ng kanyang pamahalaan ang importasyon ng mga produktong agrikultura ng Pilipinas na wala sa kanilang pamilihan. Dito ay magkakaroon ng magandang pagkakataon ang mga prutas ng Pilipinas.

Courtesy of Pilipino Star Ngayon

*** Skills improvement program, inilunsad ***

Pinangunahan kamakailan ni Makati Mayor Jejomar C. Binay ang lungsod at education officials sa paglulunsad ng Integrated Skills Improvement Program o ISIP. Layon ng programa na mapagyaman ang kaalaman ng mga residente sa lungsod sa English language sa tulong ng computerization. Ayon kay Binay ang programa ay isa sa salik sa plano ng lokal na pamahalaan na magkaroon ng IT-enabled society sa lungsod upang makapanabay sa mga pagbabago.

Ang ISIP ay pinamamahalaan ng pamahalaan ng Makati, sa pakikiisa ng Department of Education Division ng Makati, University of Makati, SM Equicom Computers, at EduQuest, Inc. Dalawang club ang bahagi ng programa ang Reading Together Clubs o RTCs, na naglalayong mapagbuti ang abilidad ng isang indibidwal sa pagbasa-pangunahing salik sa literacy skill na magbibigay-daan sa pagkakaroon ng galing sa lengguwahe; at ang IT Community Outreach Program o IT-COOP, na tutugon sa pangangailangan ng komunidad ng Makati upang mas maging handa ang mga residente sa mga kahingian sa trabaho at handa sa pagharap sa mga oportunidad pangkabuhayan.

Ang RTCs ay iho-host ng anim na paaralan sa Makati ang mga elementary school sa South, Bangkal, La Paz, Poblacion, at ng F. Benitez Elementary School. Samantala ang IT-COOPs, ay nagbibigay ng job-readiness skills training para sa mas malawak na oportunidad sa trabaho ng mga residente. Ang pagsasanay ay ginaganap sa Fort Bonifacio High School, Makati High School, San Isidro High School, Makati Science HS, Benigno Aquino HS, San Antonio HS, at Pio National HS.

Courtesy of Kabayan Newspaper

*** 200 jobs sa pagbubukas ng Petron megastation ***

Aabot sa 200 trabahador ang kakailanganin sa bubuksang Petron Megastation sa susunod na taon sa Subic Bay Freeport. Ang nasabing mga trabahante ay magiging bahagi ng operasyon ng gasolinahan na bukas ng 24 na oras at sa auto-servicing station na mayroong convenience store, mga kilalang food chain, at iba pang miscellaneous services. Ang megastation na nagkaroon ng groundbreaking kamakailan sa isang 3,200 sq. m. lot sa panulukan ng Rizal Blvd. at Argonaut Highway, Subic Gateway ay may pondong P20 milyon para sa pagtatayo nito. Inaasahang sa pamamagitan ng Petron megastation ay magkakaroon ng malaking kaluwagan sa mga motorista, turista, locators, at mga residente ng Subic.

"Setting-up a modern refueling station inside the Freeport will add to the diverse facilities that provide high-quality services to investors, tourists and residents in adjacent communities," ayon kay Chairman Felicito Payumo ng Subic Bay Metropolitan Authority sa ginanap na groundbreaking ceremony. Umaasa rin si Payumo na bukod sa maidaragdag sa ekonomiya ng Freeport, mas maraming residente ang magkakaroon ng trabaho sa gagawing pagtatayo ng megastation. Bukod ito sa 200 katao na mabibigyan ng trabaho sa sandaling magbukas na ang megastation.

Courtesy of Kabayan Newspaper

*** Pagpapatupad ng international labor standards, hiniling ***

Nanawagan kamakailan si Labor and Employment Secretary Patricia A. Sto. Tomas sa mga huwes mula sa Southeast Asia and the Pacific para sa mas maayos na pagpapatupad na international labor standards at equality principles, kasabay ng pagsasabing ito'y makatutulong sa mga manggagawa para makasabay sa hamon ng globalisasyon.

Sa kanyang talumpati sa First Asia Pacific Seminar on International Labor Standards and Equality Issues for Judges ng International Labor Organization (ILO) sa Makati City, sinabi ni Sto. Tomas na "at a time of greater economic integration, incessant technological changes, heightened global competition, and weakening national institutions, workers are now more concerned about job and income security as well as their working conditions."

"The uncertainties brought by globalization have fuelled the fear of unemployment, discrimination, inequality and further misery for workers. Therefore, the crucial role now is to strengthen existing institutions that can provide the necessary checks against exploitative situations and promote observance of labor standards and equality principles in the world," ani Sto. Tomas.

Pinuri ni Sto. Tomas ang ILO, sa pangunguna nito sa pagbubuo ng codes at standards para sa paggawa. Gayunman, aniya ang standards na ito ay mabibigo kapag hindi ipinatupad ng mga bansa. Binigyang-diin ang napakahalagang papel ng ILO conventions, sinabi ng kalihim ang komitment ng Pilipinas sa pagpapaangat ng labor standards and equality na pinatunayan ng ratipikasyon ng anim sa pitong ILO core conventions na nagsasaad ng mga karapatan ng mga manggagawa.

"These ILO Conventions ratified by the Philippine government are now enshrined in the Philippines' 1987 Constitution, the Labor Code of the Philippines, as amended, specific enabling laws, and rules and regulations issued by the Department of Labor and Employment (DOLE)," hayag ni Sto. Tomas. Aniya pa, "As a move to further enhance the local applications of ILO Conventions, my Department has issued Department Order No. 40-03 guided by the principles of the right to self-organization; expediting the dispute settlement process; responsible and acceptable unionism; and the doctrine of shared responsibility."

Courtesy of Kabayan Newspaper

*** Programa para sa kabataan ng CSC, ikakalat sa rehiyon ***

Inihayag kamakailan ng Civil Service Commission (CSC) na ipamamahagi nito sa mga rehiyon ang pagpapatupad ng Brightest for the Bureaucracy Program (BBP) nito bago matapos ang taon. Kasalukuyan nang hinahanda ng CSC ang pagte-turn-over sa National Capital Region (NCR) office nito sa Quezon City ang mga aplikasyon ng mga taong interesadong maglingkod sa pampublikong ahensya sa rehiyon.

Ang BBP ay isang special job placement program na dinisenyo upang makahikayat ng mga kabataang may superyor na kaalaman at kasanayan na magtrabaho sa gobyerno. Base sa datos ng ahensya, may kabuuang 110 job placements nang nairehistro ang 15 sa mga regional office ng CSC mula 1997 hanggang 2002.

"This does not include output of the NCR office since people still file their applications with the central office because it is also located in the region. We still process the papers but eventually, applicants will have to submit their documents to the NCR office," ani Charlene Joy Galang, senior Personnel Specialist ng CSC's examination, Recruitment and Placement Office.

Humigit-kumulang 1,000 aplikasyon ang ipapasa sa NCR, ani Galang. Halos kalahati ng mga bilang ng aplikanteng nabanggit ay kumuha na ng written examination. Mula nang ilunsad ang BBP noong September 1995, ang CSC central office ay nakapagpaskil ng kabuuang 1,180 aplikasyon. Ani, Galang ang pag-qualify sa BBP ay hindi garantiya ng anumang trabaho sa alinmang government agency na nagdedetermina kung sino ang kanilang tatanggapin.

Courtesy of Kabayan Newspaper

*** Scitech, pangkabuhayan tampok sa CSC month ***

Pagkakakitaan ang tampok sa isang buwang pagdiriwang ng Civil Service Commission ng ika-103 anibersaryo ng serbisyo-sibil sa bansa. Pangungunahan ng CSC ngayon ang selebrasyon na may temang Sama-sama... Tulung-tulong, Republika, Patatagin. Kaugnay nito, nanawagan ang ahensya sa iba pang tanggapan ng pamahalaan na makiisa sa pagdiriwang para sa lalong ikatatagumpay nito. Simula Setyembre 1 hanggang 6, idaraos ang Linggo ng Agham at Teknolohiya, Kapaligiran at Likas Yaman, kung saan mga ahensyang sakop ng siyensya at teknolohiya at natural resource sector ang mangunguna.

Bukod dito, itatampok din sa pagdiriwang ang iba't ibang pagtalakay ng Technology and Livelihood Resource Center sa mga gawaing mapag-kakakitaan.Ilan dito ay ang paggawa ng siomai at kikiam na gaganapin sa Setyembre 2, alas-2 hanggang alas-3 ng hapon; sa susunod na mga araw, katulad ding oras ay tatalakayin ang rug making, hair trimming at dyeing ; samantala sa Setyembre 5, ala-1 hanggang alas-5 ay paggawa ng puto pao ang tatalakayin. Magkakaroon din ng Magnegosyo Forum bukas ala-1 hanggang alas-5 ng hapon. Ipakikita naman ng Forest Products Research and Development Institute ang handmade paper making habang ang Philippine Textile Research Institute magkakaroon ng textile exhibit sa buong buwan ng Setyembre.

Pagbibigay-kamalayan at kahandaan kapag may sakunang tulad ng lindol ang alok ng Phivolcs. At ang Department of Environment and Natural Resources ay magkakaroon ng symposium kung paano makilatis ang isang pekeng titulo, pamamahala sa lupa, sistema ng pagtititulo sa Setyembre 4. Sa katulad ding araw, gaganapin ng Advance Science and Technology Institute (ASTI) ang Bayanihan Linux Install Fest na nagtatampok sa murang propriety software na dinebelop ng ASTI. Ang ibang ahensya ay magtatampok ng physical fitness activities, open house, recognition day, medical/dental missions at iba pang outreach programs, government retirees' homecoming, symposia, People's Day, familiarization tours, bloodletting activities, at environmental initiatives tulad ng pagtatanim ng puno at clean and green activities.

Courtesy of Kabayan Newspaper

*** 4 pang computer training center, binuksan sa Makati ***

Upang makasabay sa kasalukuyang trend ng trabaho, nagbukas pa ng apat na bagong Barangay Computer Center (BCC) ang kauna-unahang "Technology City," ang Makati. Layunin ng BCC na libreng makagamit ng kompyuter ang mga residente at magkaroon ng computer training. Sinabi ni Mayor Jejomar C. Binay na ang computer centers ay para isulong ang computer literacy sa mga residente, gayundin upang magsilbing technology kiosks para sa paperless transactions sa city hall.

" Our ultimate goal is to make these computer centers not only centers for training, but as centers where residents can access city government services and transact business with our frontline offices," ani Binay. Ang apat na bagong BCC ay matatagpuan sa barangays Post Proper North Side, South Cembo, Cembo at Guadalupe Viejo. Inilahad ni Binay na bukas ang sentro para sa lahat ng mga estudyante at mag-aaral na gustong magkaroon ng kasanayan sa basic computer, software programs tulad ng MS Windows at MS Office Applications tulad ng MS Word, Excel at Power Point.

Bukas ang mga BCC araw-araw mula Lunes hanggang Biyernes, alas-8 ng umaga hanggang alas-8 ng gabi na may tatlong training session araw-araw, tuwing alas-10 n.u-alas-12 ng tanghali; alas-2-alas-4 ng hapon; at alas-6-alas-8 ng gabi. Samantala, nag-aalok din ang pamahalaang lungsod ng computer loans para sa mga empleyado ng city hall, at ikinokonsidera rin ang gayon sa mga pampublikong guro, pulis at bumbero. At pautang ay sa pamamagitan ng Computer Loan Program (CLP). Ilan sa mga mapagpipilian ay ang IBM computers, mula sa Pentium 133 models hanggang sa IBM Netvista A22p, sa murang buwanang hulog na P456 hanggang P1,682.

"Since our city has embarked seriously on its e-governance program, it is essential for employees and, eventually, every household in Makati to have its own computer," hayag pa ni Binay. Sa kasalukuyan mayroon na rin computer centers ang mga barangay Pio del Pilar, San Antonio, Olympia, Singkamas, West Rembo, Comembo, Pembo, Guadalupe Nuevo, Poblacion, Pinagkaisahan, Rizal at San Isidro.

Courtesy of Kabayan Newspaper

*** P1B, ilalaan para sa 2 barko ***

Magtatalaga ang WG&A Philippines ng P1 bilyon na pambili ng dalawang bagong barko bilang suporta sa Strong Republic Nautical Highway (SRNH) program ni Pangulong Macapagal-Arroyo at upang masemento ang estado nito bilang pangunahing shipping company sa bansa. Ang dalawang bagong barko ay ilulunsad ng WG&A bilang Superferry 17 at 18 upang makatuwang ng iba pang barko nito na kasalukuyang dumadaong sa 22 pantalan o terminal sa buong kapuluan.

"The government has made the SRNH more attractive to our shippers who could now look at easier and more economical access to their markets," ang sabi ni WG&A President Endika Aboitiz kamakailan sa isang seremonyang nagbukas ng ikalawang ruta ng SRNH sa pier ng Maynila. Naniniwala ang WG&A na susi ang konstruksyon ng marami pang pantalan sa bansa at ang pagpapalakas sa roll-on, roll-off type ng passenger at cargo vessels sa pagpapalawig ng kalakalan sa Luzon, Visayas at Mindanao.

"We believe that our role in the national economy is to enable trade and take the lead in improving the shipping industry," ani Aboitiz. Ang buong fleet ng WG&A ay sinertipikahan ng International Safety Management Code standard at ang kompanya'y pinarangalan din bilang "Hewitt Best Employers in Asia Award."

Courtesy of Kabayan Newspaper

*** Distance learning sa Sorsogon ***

Sa ngayon, pinag-iisipan ng provincial government ng Sorsogon ang isang proyekto tungo sa isang de-kalidad, balanse, at abot-kayang edukasyon sa pamamagitan ng satellite technology. Ang nasabing proyekto na pinamagatang "Initiative for the Establishment of Distance Learning Centers as Delivery Mechanism for Capability Building" ay magbibigay ng access sa mga Sorsoganons tungo sa isang pormal at di-pormal na mga kurso mula sa iba't ibang institusyon dito sa Pilipinas at maging sa ibang bansa.

Kung ito ay maipapatupad, ang mga distance learning center ay maisasaayos sa 15 munisipyo nito na siya namang gagawa ng linkages sa pamamagitan ng Internet. Magkakabit din ng isang remote gateway facility sa loob ng provincial capitol na siyang mag-uugnay sa Internet backbone at sa iba pang Internet broadcast services sa pamamagitan ng isang central hub station sa Metro Manila via satellite. Sa pamamagitan nito, iba't ibang communication applications ang maaaring maitatag kaagad na kinabibilangan ng interaction distance education and training programs para sa paaralan at unibersidad na CHED-accredited sa Maynila at sa ibang bansa para sa undergraduate, graduate, at post-graduate programs; mabilis na Internet access sa mga piling opisina ng pamahalaang panlalawigan at panlokal, at pagpapakabit ng pampublikong calling offices na may IDD at NDD telephones services.

Sa pagkakaroon naman ng communication linkages sa pagitan ng pamahalaang panlalawigan at mga bayan nito na siyang mabibigyang-daan sa isang video conference at direct video and audio broadcasting; ang epektibong paglilipat at access sa mga mahahalagang datos na maaaring gamitin sa pag-uulat at pagmomonitor sa mga panahon ng mga di-inaasahang sakuna at kalamidad, at sa pagpapanatili ng katahimikan at kaayusan, strategic networking sa mga investment, at sa iba pang gawaing pang-ekonomiya.

Kung ito nama'y maipapatupad, ang mga nasasakop ng proyekto ay magkakaroon ng malawak na pagkakataong mapalago ang sarili sa pamamagitan ng mas mataas na antas ng pag-aaral, makikiisa sa mga income-generating project sa pamamagitan ng pag-alam sa mga kakayahang pangnegosyo, at magkaroon ng mas mababang singil sa telepono.

Ang proyektong nabanggit ay ipinakilala kamakailan sa mga alkalde ng mga bayan ng lalawigan, iba't ibang pinuno ng opisina, at iba't ibang tagapangasiwa sa pamahalaan. Gayunman, ang buong lakas na pagpapatupad ng proyekto ay nangangailangan ng pagpayag ng Sangguniang Panlalawigan, na siyang magbibigay awtoridad kay Gobernador Raul Lee na humingi ng badyet para sa nasabing proyekto.

Courtesy of KABAYAN NEWSPAPER

*** MIAA aviation institute, binuksan ***

Binuksan kamakailan ng Manila International Airport Authority (MIAA) ang sarili nitong aviation training insttute, ikalawa sa buong Asya, upang magsanay ng mga kasalukuyang trabahador sa airport. Pinangunahan ni MIAA General Manager Edgardo Manda ang pagbubukas ng Aviation Services Training Institute Inc. (ASTI), na makatutulong din upang mabawasan ang pagkuha ng MIAA ng contractual manpower services nito nang 30 hanggang 40 porsyento.

Ang ASTI, isang subsidiary ng MIAA, ay may layuning magbigay ng specialized aviation training and manpower at magdebelop ng mga programa. Ito rin ay naglalayong kumuha ng expert fellowship at makipagpalitan ng impormasyon sa mga lokal at pandaigdigang aviation agencies.

*** SINGLE TICKETING, IBINASURA Uniform traffic code, ipatutupad ***

Pamahalaang lokal na ang mamamahala sa trapiko matapos sama-samang tutulan kahapon ng mga alkalde sa Metro Manila ang single-ticketing scheme na nais ipatupad ng Metro Manila Development Authority. Kasabay nito, nabuo ang isang bagong traffic law na tinawag na Uniform Traffic Code sa ginanap na meeting ng Metro Manila Council sa tanggapan ng MMDA.

"Basically, the local government unit has taken over the traffic management but the MMDA's task will focus on the developmental aspects of traffic," ayon kay Bayani Fernando, MMDA chief. Gayunman, aabot pa ng halos isang buwan bago ito maipatupad dahil magsasagawa pa ng mga pag-aaral. Inatasan din umano ang MMDA ng council na balangkasin ang Uniform Traffic Code.

"Since almost all of the LGUs have come up with their own ordinances stating their own traffic regulations and fines, the MMDA was tasked to harmonize these ordinances and come up with a common code to be followed by all and all the fines and penalties will also be uniformed," dagdag ni Fernando. Ang LGUs din umano ang magpapakalat ng mga traffic enforcer na magmamantina ng daloy ng trapiko.

*** 13th month pay sa katulong ***

Makatatanggap na ng 13th month pay ang mga katulong na katumbas ng isang buwang sahod na dapat bayaran ng hindi lalagpas ng Disyembre 24 kada taon. Ito ay kung maisasabatas ang House Bill 5804 o ang Magna Carta for Household Helpers na inaprubahan kamakailan sa ikatlo at huling pagbasa sa Mababang Kapulungan. Ang Magna Carta for Household Helpers, na ipinanukala sa House Bill 5804, ay nagtatakda ng minimum compensation para sa mga house helper.

Sa National Capital Region, hindi bababa sa P 1,500 kada buwan ang dapat tanggapin ng mga katulong habang P 1,200 kada buwan ang pasahod sa ibang chartered cities at first class municipalities, at minimum na P 1,000 kada buwan sa ibang munisipalidad. Sa ilalim ng batas, lahat ng katulong ay sakop ng Social Security System at kasali sa lahat ng benepisyo ayon sa mga angkop na probisyon ng inamyendahang Republic Act 1161. Saklaw rin sila ng Philippine Health Insurance Corporation at tatanggap ng mga benepisyong kaakibat nito.

***'Halal Task Force', binubuo ***

Hinihintay na ng mga mangangalakal dito ang pagbubuo ng Mindanao Halal Industry Task Force (MHITF) kaugnay ng panukalang gawing Halal production base ng bansa ang rehiyon. Ipinanukala rin na ideklara ang Mindanao bilang accreditation and certifying body na may kapangyarihan, mapagkakatiwalaan, independyente at technically capable.

Ayon sa mga negosyante rito, sinusuportahan ni Pangulong Arroyo ang naturang panukala at iniatas na niya sa mga kinauukulang ahensiya tulad ng DTI, DA, SPDA, at DOH na magsumite ng kanilang joint recommendation kaugnay ng panukala kabilang ang isang action place na magpapatupad nito. Tumugon ang DA sa pamamagitan ng pagho-host ng pagpupulong ng mga ahensiya kaugnay sa nabanggit upang makabuo ng pinal na panukala para sa pagbubuo ng Philippine Halal Meat para sa buong bansa. Ayon naman sa Mindanao business leaders, nagsagawa ang SPDA ng inter-agency consultation upang iprisinta ang balangkas ng Philippine Halal Standards.

***SA PAGBISITA NI GMA RP products, isasama sa GSP ng US ***

Hihilingin ni Pangulong Gloria Macapagal-Arroyo sa kanyang walong araw na state visit sa Estados Unidos ang inclusion at reinstatement ng mga produktong Pilipino tulad ng dried mangos, pineapple juice, carrageenan at tuna sa susunod na cycle ng US General Systems of Preferences (GSP). Sinabi ni Trade and Industry Secretary Mar Roxas na ang nasabing hiling ay para sa karagdagang benepisyo, na kapag naaprubahan ay isang magandang simula sa pagbibigay sa Pilipinas ng mahigit sa $1 bilyon sa GSP benefits.

Sa mga nakaraang pagbisita ng Pangulo sa US, ipinangako ng administrasyon ni Bush na makikipagtulungan sa kongreso ng US upang maibigay sa Pilipinas ang nasabing benepisyo. Nabuo ang kasunduang ito sa huling araw ng state visit ni Pangulong Arroyo sa US noong Nobyembre 2001.

Ang GSP na isang iskema kung saan ang US ay nagbibigay ng preferential treatment sa humigit-kumulang 4,100 produkto mula sa 139 benepisyaryong bansa sa porma ng mga duty free access na isang pangunahing salik sa economic engagements ng ating bansa sa US.

Ayon pa kay Roxas, ang Pilipinas ang 6th major beneficiary country ng iskemang ito noong 2001, kung saan may kabuuang $676 milyon sa GSP imports ang bansa. Ang iskemang ito ay nakapagdagdag sa ekonomiya ng Pilipinas sa pamamagitan ng pag-akit nito sa foreign investors at pagbibigay ng de-kalidad na employment opportunities at sa pagtaas ng foreign exchange generation.

Bago pa man ang pagbisita, muling nagpetisyon ang Pilipinas para sa GSP kasabay ng US-RP Trade and Investment Council meeting na ginanap ngayong Mayo.

"Ang isang balanseng aksiyon sa isinusulong na ito ng bansa ay mutually beneficial para sa US at sa Pilipinas," ayon kay Roxas. "Sa parte ng US, ang GSP duty free benefits na maaaring mag-translate sa mga lower costs para sa Camelbak products. Ang Pilipinas ay gayundin, sa pagkakamit ng mga benepisyo sa porma ng foreign exchange earnings at generation of employment."

***Programang Sulong ng DTI, nagpapautang ng P126M ***

Hinihikayat ng Department of Trade and Industry (DTI)-Cebu Provincial Office (CPO) ang lahat ng small and medium enterprises (SMEs) sa Cebu na samantalahin ang ipinagkakaloob ng pamahalaan na "SME Unified Lending Opportunities for National Growth" o Sulong.

Ang Sulong ay isang unified lending program para sa mga SME na binalangkas upang suportahan ang National SME Development Plan ng Arroyo administration. Ayon kay DTI-CPO provincial director Nelia Navarro, P126 milyon sa ilalim ng Sulong Program ang napunta sa Cebu-based SMEs hanggang noong Abril ng taong kasalukuyan.

Nakapagpalabas na ang Sulong ng P2 bilyon para sa may 4,000 SME-beneficiaries sa buong bansa hanggang noong Marso. Isa sa mga layunin ng programa ay bumuo ng mas malawak, at walang hangganan na financing system na magbibigay ng pagkakataon sa mas maraming SMEs na maka-avail ng short-term at long-term funds.

Ang programa na nagsimula noong Enero ng taong kasalukuyan ay naglalayong ipamahagi sa mga deserving na SMEs ang P10-bilyon pondo na naipon mula sa iba't ibang government financial institutions na kinabibilangan ng Development Bank of the Philippines, Land Bank of the Philippines, Small Business Guarantee and Finance Corp., Philippine Export-Import Credit Agency, National Livelihood Support Fund at Quedan and Rural Credit Guarantee Corp.

Ayon pa kay Navarro, karamihan ng mga benepesyaryo ng P126 milyon ay nasa furniture manufacturing, food processing at home furnishing. Sa ginanap na 6th National Conference of the Liga ng mga Barangay sa Pilipinas sa Waterfront Cebu City Hotel noong nakaraang linggo, iprinisinta ni DTI Assistant Secretary Armin Raquel-Santos ang Sulong program sa mga barangay captain nang sa gayon ay maiparating nila sa mga SME sa kani-kanilang lokalidad ang ukol dito.

Binigyang-diin ni Raquel-Santos na lahat ng negosyo sa lahat ng industriya, maliban 'yung may kaugnayan sa pangangalakal ng imported na paninda, alak, sigarilyo at extractive industries, ang kuwalipikadong mangutang sa ilalim ng programa. Para sa short-term loans, maaari itong magamit para sa export financing o isang credit line para sa pansamantalang kapital. Maaaring pondohan ng programa ang hanggang 70 porsyento ng halaga ng letters of credit o ng working capital na kinakailangan ng hanggang P5 milyon. Para naman sa long-term loans, maaaring mag-aplay ang SME ng utang para sa permanent working capital, o upang ipambili ng mga kagamitan o ng lote o kaya ay gamitin sa pagpapatayo ng gusali o warehouse.

***Trabaho para sa mga bagong graduates ***

Davao City - Mahigit 2,000 trabaho ang nakaantabay sa mga recruitment agency at pitong lokal na kompanya dito sa gaganaping jobs fair sa SM City Megamall sa Mayo 1, kaugnay ng paggunita ng Labor Day. Inihayag ni Pangulong Arroyo kamakailan na inatasan niya si Department of Labor and Employment (DoLE) regional director Lourdes Transmonte na gayahin ang matagumpay na jobs fair na ginanap sa SM Megamall sa Mandaluyong.

"You should attend the jobs fair in SM in Davao City on May 1," anang Pangulo sa mga nagsitapos sa University of Mindanao sa kanyang talumpati sa pagtatapos, kung saan siya panauhing pandangal. Aniya, ang jobs fair ay dapat magtagal hanggang Hunyo 10, upang magkaroon ng panahon ang graduates na mag-apply at mag-ayos ng mga kakailanganin nilang papeles.

"If you can't find jobs on May 1, you have until June 10 since we're still continuing with our jobs fair in SM," ani Arroyo. Sa pinakahuling estadistika ng DoLE, napag-alaman na tinatayang 3.6 milyon katao sa bansa ang walang trabaho. "There are also 365,000 new graduates this year," dagdag pa niya na kuwalipikado sa workforce. Ibinunyag pa ng Pangulo na mayroong 100,000 bakanteng posisyon sa DoLE ang naghihintay na mapunan.

Bahagi ang mga bakanteng posisyon ng Summer Jobs Program ng Pangulo na available sa pamamagitan ng Kabuhayan 2003 Action Center ng DoLE. Nauna nang sinabi ni Labor and Employment Secretary Patricia Sto. Tomas na ang Kabuhayan jobs fair sa SM, na nagbukas noong Abril 5 at magtatagal hanggang Hunyo 10 sa SM in Mandaluyong ay bahagi ng Kabuhayan, Kabahayan at Kahusayan sa Pamamahala Program (KKK) ng Malakanyang.

Ani Sto. Tomas ang available slots para sa programa sa buong bansa ay kinabibilangan ng 60,000 youth work sa pagpapaganda at pagpapalinis ng komunidad; 10,000 office work, sales, hotel and restaurant services; 50,000 factory work sa economic zones and technology parks;

50,000 jobs sa construction at infrastructure projects; at 5,000 livelihood opportunities sa tourism-related, cottage at micro-enterprises. Sinabi pa ng opisyal na mayroong mahigit 3,000 training slots available sa jewelry-making, garments at textile manufacturing.

*** PARA SA EXPORTERS SA EU Phytosanitary certificate,
kinakailangan ***

Pinapayuhan ng Department of Trade and Industry (DTI) ang mga exporter ng cutflowers, prutas at gulay na kumuha ng phytosanitary certificate sa Bureau of Plant Industry (DA-BPI) ng Department of Agriculture bago ipadala ang kanilang mga produkto sa bansang Europeo. Ani Trade and Industry Secretary Manuel A. Roxas II, naglabas kamakailan ang European Union (EU) ng bagong regulasyon na ang mga produktong papayagan lamang makapasok sa rehiyon ay yaong may phytosanitary certificate mula sa mga kinauukulang ahensiya ng bansang nag-eeksport.

Ang bagong alituntunin, na naging epektibo nitong Abril 1, 2003, ay naglalayong tiyakin na ang mga iniimport na produkto ay walang mga organismong kinilala ng EU na mapanganib.

Ang mga mapanganib na quarantine (Q) organisms ay kinabibilangan ng liriomyza and spodiptera, arebemisia tabasi, thrips palmi, heliothis zea, gayundin ng fungi, viruses at bacteria.

"EU decided to issue stricter measures in spite of the existing preventive regulations because many Q-organisms can still be detected on cutflowers and vegetables coming from other countries," pahayag pa ni Roxas. Inilahad din ni Roxas ang ulat ni Cora Canlas, DTI trade assistant sa Philippine Trade and Investment Center sa Netherlands.

"As an added measure, the products will systematically be inspected upon arrival in EU even if these were already covered by phytosanitary certificates," saad ng ulat.

"The rising global concern for consumer health and environmental safety has prompted legislation and strict enforcement by foreign countries like the EU of certain standards on labeling, markings and certification," ayon kay Roxas

*** Dalagang ina, may maternity leave--CSCo ***

May asawa man o wala, ang mga empleyado ng pamahalaan na buntis ay may karapatan sa benepisyong maternity leave. Binigyang diin ng Civil Service Commission (CSC) ang mga bagong panuntunan sa maternity leave, na karapatan ng bawat babaeng nasa serbisyo kahit anuman ang marital at employment status nito.

Sa inilabas na CSC Memorandum Circular No. 22 noong nakaraang taon, isinasaad ang: "every woman in the government service who has rendered an aggregate of two or more years of service shall, in addition to the vacation and sick leave granted to her, be entitled to maternity leave of 60 calendar days with full pay." Dati ang mga empleyado ng pamahalaan na kasal lamang ang puwedeng makakuha ng benepisyong nabanggit.

Ang paglilinaw sa nabanggit na atas ay tugon sa mga katanungan ng kababaihang nasa sitwasyon, lalo na yaong mga hindi kasal o dalaga na ang maternity leave ay tinatanggihan ng ilang ahensiya ng gobyerno. Ayon kay CSC Chair Karina Constantino-David, "maternity leave shall be granted to female employees in every instance of pregnancy irrespective of its frequency."

Sinabi pa ng CSC chief na maging yaong mga babaeng may empleyado ng pamahalaan na may nakabinbing kasong administratibo ay may karapatan sa benepisyong ito. Gayundin sa mga kontraktuwal na empleyado. Ang maternity leave naman ng mga empleyadong higit na ng isang taon sa serbisyo ngunit mas mababa sa dalawang taon ay kukuwentahin depende sa panahon ng kanyang inilaang serbisyo. Yaong mas mababa sa isang taon nagtrabaho ay may karapatan para sa 60 araw na leave at isang buwang bayad. Idinagdag pa ni David na "enjoyment of maternity leave cannot be deferred. Women employees should benefit from it within the actual period of delivery in a continuous and uninterrupted manner not exceeding 60 calendar days."

*** Bagong 'trade centers,' itatayo ***

Hindi na kailangan pang makipagsiksikan o makipag-unahan sa Divisoria o Balintawak ng sinumang retail o wholesale buyers ng mga gulay sa Metro Manila para sa mababang presyo. Ito ani Agriculture Sec. Luis Lorenzo Jr. ay dahil sa maglalagay na ang mga magsasaka mula sa Benguet ng limang iba pang trade centers na maglalaan ng dekalidad na mga gulay na may mu-rang presyo katulad ng Divi-soria at Balintawak para sa publiko.

Ang limang alternatibong "Bagsakan" na sasakop sa bahagi ng Quezon City Memorial Circle, SIDCOR weekend market sa Cubao, Manila Seedling Bank sa kahabaan ng Edsa cor. Quezon Ave., Quezon City at QC Hall at sa Fish port sa Navotas na pinangangasiwaan ng Philippine Fis-heries Development Authority.

Ani Lorenzo, ang ideyang pagtatatag ng alternatibong trade centers bukod sa Divisoria ay upang makatipid sa distribution cost na isinasangkalan ng mga mangangalakal na nagkakamal ng tubo sa pagpapataas ng presyo habang ang mga magsasaka ay patuloy na nagdarahop.

Idinagdag pa ng kalihim na ang mga pamamaraang ito ang nagsilang ng kartel sa mga mangangalakal sa Benguet at Divisoria na naging maimpluwensiya hanggang sa puntong nagdidikta na ng presyo.

"In the interest of farmers and the consuming public, we are determined to limit the layers of unscrupulous middlemen who are so well-entrenched in the vegetable trade and for years, had been dictating prices to suit their own selfish interests," ani Lorenzo.

Base sa ulat sa kanya ni Agri-business at marketing assistance service director Salvador Sala-cup, sinabi ng kalihim na isang five man vegetable team mula sa Cordillera sa pangunguna ni Benguet provincial board member Johnnny Uy at La Trinidad councilor John Kim ang nag-inspeksyon kamakailan sa Quezon Memorial Circle at iba pang ipinapanukalang lugar para sa pasili-dad na gagamitin ng trade center.

Mula sa pagtataya ng pangkat, napagdesisyunang ikonsidera ang circle na pinakamabuting "bagsakan" na abot ng pampublikong sasakyan.

Ipinaalam din ng grupo sa DA officials na kikilalanin na nito ang mga pangkat ng magsasaka sa Benguet na magsusuplay sa trade centers. Ayon pa kay Lorenzo si Salacup at Bureau of Post-Harvest Research and Extension Director Ricaro Cachuela, ay nag-alok na ng reefer truck para sa Benguet farmers na magdadala ng kanilang paninda sa Metro Manila.

"The offer presents an opportunity for farmers to save on high freight cost, which in turn should translate into lower cost of vegetables both at the wholesale and retail level," saad pa ni Lorenzo.

*** Unaccredited private pre-schools, bawal na ***

Ang pagdami ng unaccredited private pre-schools at day care centers sa bansa ay di nakabubuti para sa paggugol ng estudyante ng matagal sa pag-aaral at dagdag na gastos ng mga magulang. Kamakailan ay nadiskubre na maraming unaccredited private school sa Taguig at iba pang lugar ang nago-operate. Ipinasara ang isang pribadong paaralan sa Taguig sa utos ni Mayor Sigfrido Tinga. Pinayuhan ni Mrs. Lou Limena, opisyal ng DepEd's Bureau of Elementary Education Curriculum Development Division (BEE-CDD) ang mga magulang ng apektadong mag-aaral na walang dapat ipangamba dahil ang kanilang anak ay maaaring makapag-enrol kahit walang completion ng pre-school education sa pampublikong paaralan. Iginiit ng nag-aalalang magulang na ang dahilan kung bakit kailangan nilang makapasok sa pre-school ang kanilang mga anak ay upang makakuha ng karagdagang kalidad ng edukasyon sa kanilang paghahanda sa paaralan. "It is the right of every school age students starting from six years old to enter on the elementary level," pahayag naman ng opisyal.

Ayon kay Limena, nakasaad sa konstitusyon na ipinagbabawal sa mga guro sa elementarya ng pampublikong paaralan ang di-pagtanggap ng anim na taong mag-aaral. Tunay na lubos ang kalugudan ng mga guro kung ang mga mag-aaral ay nakapagtapos ng nursery, kindergarten o prep upang madaling matuto sa aralin. "But this does not mean that they enroll in the private pre-school institutions," pahayag ni Limena. Wala raw ipinagkaiba kung pumasok sa day care centers at private pre-school ang estudyante, dahil ang importante ay ang makapag-aral ang mga bata. Idiniin pa ng opisyal na binigyang pagkakataon ng Department of Social Welfare and Development ang public pre-school na magbukas ngunit sa kaso ng private pre-school, ang accreditation ay kailangan munang aprubahan ng DepEd.

"The pre-school operators or owners, whether learning centers or day care centers, should be properly stated in the signs posted in the front of the schools for the parents to immediately determine the status of the said institution," dagdag pa ni Limena.

Sa kaso ng pribadong paaralan, ang may-ari ng paaralan ay kailangang magpalit ng permit kada taon upang makapangasiwa. Subalit maaaring mamahala ang paaaralan kung may permanenteng permiso ito.

"After the fifth year, school owners could then work for the recognition from the department," ayon kay Limena.

"By that time, the schools should have improved their curriculum, facilities and their teachers' welfare," dagdag pa niya.

*** Libreng kurso sa pagkumpuni ng computer, sinimulan sa Taguig ***

Sa layuning makaagapay ang mga taga-Taguig sa mabilis na pag-imbulog ng information technology, inilunsad ni Mayor Freddie Tinga ang isang basic computer maintenance skills program upang libreng makapagturo ng kaalaman sa pagkukumpuni ng computer, partikular sa out-of-school youths. Sa pagtataguyod ng Information Technology (IT) Department ng pamahalaang bayan, makapagbibigay na ng kasanayan hinggil sa fundamental PC operation, assembly at disassembly ng computer, at pagkilala sa mga bahagi ng hardware sa pagmamantine ang mga estudyante. Nais din ng pamahalaang lokal na maihanda ang mga sasali sa programa na nagpaplanong kumuha ng kurso sa computer troubleshooting at repair sa hinaharap.

Ang mga nagpatalang estudyante ay isasailalim sa 16 na oras ng pagsasanay na hahatiin sa dalawang sesyon. Ang klase ay gaganapin tuwing Sabado at Linggo, simula alas-9 ng umaga hanggang alas-4 ng hapon. Bahagi rin ng proyektong ito ang isang basic secretarial skills program. Ayon sa IT Department, kuwalipikadong makasasali sa naturang skills program ang mga residente ng Taguig na high school graduate at marunong gumamit ng computer. Bukas ang programa sa mga may edad 18 taong gulang pataas. Kapag nakakumpleto ng module, matututo ang mga estudyanteng ilarawan ang components ng computer system, kilalanin ang hardware parts at mga gamit nito, magkabit ng PC hardware parts at software configurations, bumuo at magbaklas ng computer at mantenihin ito. Nagkaroon ng pagpapatala sa Usuan Elementary School noong Pebrero 1 sa tulong ng barangay sa ilalim ni Kapitan Sonny Marcelino.

Ipatutupad ng IT Department ang libreng basic computer maintenance skills program at basic computer secretarial skills program para sa 45 batches ng mga nais magsanay simula Pebrero 8 hanggang Disyembre 28 batay sa kaukulang iskedyul ng itinakda sa mga computer laboratory na binuo ng pamahalaang lokal sa Usuan Elementary, Signal Village, Hagonoy, Silangan, Tipas, Tenement at Taguig Elementary School. Maaaring makipag-ugnayan sa IT department ng pamahalang bayan upang makibahagi sa makabuluhang proyektong ito upang maisulong ang programang "Kabataan may Dunong sa Teknolohiya" ng kasalukuyang administrasyon

*** FAMILY CIRCLE PROGRAM, SISIMULAN ***

Ilulunsad ng Department of Labor and Employment (DOLE) sa susunod na taon ang "family circle" program na naglalayong pahusayin ang monitoring ng overseas Filipino workers (OFWs), lalo na ang mga lantad sa human immunodeficiency virus o acquired immunodeficiency syndrome (HIV/ AIDS). Sinabi ni Labor Secretary Patricia Sto. Tomas na ang programa ay tutuon sa re-integrasyon at pagtulong sa mga pamilya ng mga OFW na makaagapay sa pagkawala ng kanilang kapamilya. Ang mga social welfare officer ang magsasaayos para sa family groups.

Samantala, ang mga pamilya ng OFWs, ay aatasang magbigay ng impormasyon kaugnay sa kalagayan ng kanilang mga kasambahay na nagtatrabaho sa ibayong-dagat, upang mapahusay ng pamahalaan ang reaksiyon nito kung sakaling nagkakaroon man ng krisis. Ang community-based re-integration program ay isang added curriculum sa standard pre-departure orientation para sa migrant workers. Ayon pa kay Sto. Tomas, wala ring halaga kung magsisihan kaugnay sa pagkakahawa ng sakit na HIV/AIDS ng mga manggagawa.

"It's a human nature problem. I don't think there's a 100 percent surefire way, short of putting a chastity belt on all of them," aniya. Pero ikinokonsiderang edukasyon pa rin ang nananatiling pangunahing panlaban sa panganib na dulot ng unprotected sex ng mga OFW.

"We can give them condoms and hope that having condoms, they would now be able to better take care of themselves. Also, some measures of social discipline hopefully through pressure from their peers and their own families as well," pahayag ni Sto. Tomas.

At sinabi pang hindi rin garantiya ang paggamit ng condom bilang mabisang proteksiyon laban sa sakit na HIV/AIDS.

*** Maynila, magtatayo ng OFW welfare office ***

Magkakaroon ng isang overseas welfare office sa lungsod ng Maynila na tutulong sa pamilya ng mga overseas Filipino workers na makakuha ng tulong pinansiyal at legal. Ito ang layunin ng ordinansang inihain sa konseho ng lungsod ng Maynila ni Konsehal Don Ramon Bagatsing kamakailan. Anang konsehal, ang welfare office ay para sa mga OFW na permanenteng residente ng Maynila kasama ang kanilang pamilya at mga benepisyaryo. Ang ganitong suporta ng pamahalaang lungsod ay bilang pagkilala sa mahalagang papel na ginagampanan ng mga OFW para maiangat ang ekonomiya ng bansa.

Ang ordinansa, kapag naaprubahan, ay bubuo rin sa Manila Overseas Welfare Commission na namamahala sa suportang pinansiyal at legal sa mga OFW at kanilang pamilya rito sa bansa. Ang nasabing komisyon ay bubuuin ng isang chairman at anim na miyembro na itatalaga ng alkalde ng lungsod mula sa listahan ng mga nominado na isusumite ng konseho. Ang komisyon din ang makikipag-ugnayan sa mga paaralan at iba pang ahensiya sa lungsod upang bigyang prayoridad ang mga benepisyaryo ng mga OFW sa panahon ng enrollment at kung maaari, mapababa ang kanilang matrikula.

Isang milyon piso ang ilalaan taun-taon upang magamit ng namomroblemang OFWs. Tutulungan din sa pamamagitan ng nasabing pondo ang pamilya ng OFW na namatay sa pagtatrabaho o kaya naman ay naaksidente. Gayundin, sasagutin ng pondo ang medical at dental expenses ng kanilang mga benepisyaryo. Halaga namang hindi lalagpas sa P20,000 ang ilalaan para sa burial expenses ng namatay na OFW. "It's about time that the city government recognize the hard work of OFWs who contribute billions of pesos to our economy through compensation even on their simple necessities," ani Bagatsing.

*** Passport size photos na sa CSC exams ***

Passport size photos na ang kailangang isumite ng sinumang kukuha ng anumang pagsusulit na pinamamahalaan ng Civil Service Commission. Kasabay nito, muling iginiit ng CSC na maaari nang umeksamin para sa Career Service Professional at Subprofessional level ang mga indibibwal na may 18 taong gulang pataas anuman ang natapos nito sa pag-aaral.

Ayon kay CSC chairperson Karin Constantino David, ang lahat ng larawan na isusumite, colored o black and white, ay dapat na magkakatulad at may kasamang name tag. Ang pagpapakuha sa larawang isinumite ay dapat ginawa sa loob ng nagdaang anim na buwan bago ang paghahain ng aplikasyon para makakuha ng pagsusulit. Mahigpit na ipinagbabawal ang pagsusumite ng mga scanned o computer generated, cutout, at xeroxed photos.

Sa pagkuha ng Career Service Professional at Subprofessional examinations, kinakailangang magsumite ang isang aplikante ng apat na larawan. Para sa taong ito, magbibigay ang CSC ng limang uri ng pagsusulit. Ang mga ito ay ang: Local Scholarship Program Bachelor's Degree Completion (LSP-BDC) na gaganapin sa Pebrero 16; Career Service Professional at Subprofessional examinations (paper and pencil test) sa Abril 13, Hulyo 20 at Oktubre. 12; Foreign Service Officer (FSO) sa Mayo 18; Local Scholarship Program Master's Degree Course (LSP-MDC) sa Hunyo 8; at ang Career Service Executive Examination (CSEE) sa Hunyo 8 at Nobyembre 16.

Araw-araw namang ibinibigay ang Career service examinations sa pamamagitan ng computer assisted test (CSE-CAT) sa lahat ng CSC regional offices kabilang ang central office sa Batasan Hills, Quezon City.

*** 3 PINOY KIDS NALO SA WORLD PAINTING CONTEST ***

Tatlong Filipino pupil ang nagwagi sa isang world painting competition sa Athens, Greece at tumanggap ng mga medalya ng karangalan. Ayon sa Department of Foreign Affairs (DFA), sina Jhoanna M. Villanueva, grade 2 pupil; Norman Roberto Gellegani, grade 4 pupil; pawang sa Fernando C. Amorsolo Elementary School sa Sta. Ana, Manila at Anthea Carmeli I. Pena, grade 2 pupil ng Divine Light Academy sa Bacoor, Cavite ang mapalad na nakapag-uwi ng medalya sa naganap na 10th International Exhibition of Children's Painting sa Athens.

Ang nasabing kompetisyon na may temang "The Olympic Games 2004 for the Culture and Peace of Children All Over The World" ay sinimulang isagawa noong Oktubre at nitong Disyembre ay tinanggap ang nasabing mga medalya mula sa mga opisyal ng Embahada ng Pilipinas sa Athens. Nabatid na may 27 bansa ang nagpartisipa sa naturang patimpalak at ang tatlong batang estudyante ang napili sa mga pinakamagaling na nagpinta ng "imaginative paintings" na may kaugnayan sa katahimikan ng mundo mula sa mga inukit na peace symbols at human interaction.

Ang lahat ng mga entries ay na-exhibit sa lobby ng National Research Institute sa Athens at inilipat pa sa mga pangunahing lungsod at rehiyon sa Greece. Ang orihinal na paintings ng mga batang Pilipinong nagwagi ay ibinalik sa mga batang mag-aaral at inilagay sa kani-kanilang paaralan para sa exhibit.